Meta di un scol basico no ta solamente duna e alumno enseñansa (instruccion) pero tambe informacion cu ta yuda forma su caracter despues pa e dia di mayan. Ta pesey tambe nos ta sigui mantene principionan di e programa “Disciplina Conciente”. Nos comunidad ta multicultural p`esey e mucha mester por haya hermentnan cu lo yud’e traha ariba su futuro y siña comunica cu otro. Ta pesey nos ta traha tambe riba e parti emocional/spiritual di nos alumnonan. Nos meta ta pa yuda capacita nos alumno di tal forma cu e por bira un ciudadano responsabel y satisfecho, cu tin interes pa sigui educa su mes pa asina e por beneficia su comunidad/pais. Mas ainda den e temporada dificil aki cu cambionan debi na pandemia di COVID 19, scol mester a adapta su formanan di duna les y contacto cu alumno y mayor. Pero toch nos ta contento di por ofrece bo e buki aki di manera cu bo por studi’e y ta na altura di loke ta pasa na scol. Nos ta haci esaki pasobra abo, mayor, hunto cu e alumno ta hopi importante pa nos. Hunto nos ta forma “un famia” . Di antemano masha danki pa bo cooperacion. Na boso yiu HOPI EXITO den su enseñansa.

Na boso yiu HOPI EXITO den su enseñansa.

Aruba Airport Authority N.V. (AAA) su Wings of Hope (WoH) ta hasi entrega oficial di solar panels na Colegio Cristo Rey como e ganador di e prome Energy Champion Competition.

Como parti di WoH su meta di “Affordable and Clean Energy”, Colegio Cristo Rey a wordo anuncia como e ganador absoluto na 2021 di e prome Energy Champion Competition y a ricibi AWG 20,000.00 pa ehecuta nan plan pa reduci consumo di energia di cual nan a kies pa instalacion di solar panels. Den presencia AAA su CEO Joost Meijs, WoH representa dor di Armand Kelly, Christine Kaarsbaan-Leo, Keyli Vrolijk, Selkys Winterdaal y Angeline Flemming, Colegio Cristo Rey su team y Sra. Baly di SKOA, a hasi entrega oficial di e solar panels na e scol. Cu e instalacion aki, Colegio Cristo Rey lo kier reduce nan consumo di energia anual cu 20%.

WoH’s su competencia tabata tambe pa concientiza y crea curiosidad bou di e studiante- y maestronan riba iniciativanan sostenibel. WoH lo sigui inclui studiantenan y e comunidad di Aruba den diferente proyectonan y alabes crea concientizacion riba e importancia di practicanan sostenibel y encurasha un y tur pa acepta cambionan cu ta crea un mihor future sostenibel pa nos tur.

Riba e prome dialuna di cada luna alumno y maestronan di nos scol ta
uni pa haci nos apertura di siman. E ta duna nos oportunidad pa duna balor na nos Himno y Bandera. E ta yuda nos sinti nos uni. Tin ocacion pa papia riba topiconan actual di scol pero tambe riba topico social of religioso relevante di comunidad. Ta duna nos oportunidad pa premia nos alumnonan cu a sobresali den un of otro actividad. Ta duna nos oportunidad tambe pa generalmente stimula comportacion positivo y corigi comportacion menos positivo na scol. Esaki por sosode mas biaha den luna tambe segun nesecidad of tema.