Notanan Importante

Nos scol ta un scol Catolico. Mayoria di mucha ta Catolico. Muchanan cu no ta Catolico ta haya les di Godsdienst. E muchanan aki tambe ta bay misa cu scol. Si un mayor no kier pa su yiu bay misa, e tin cu tene su yiu na cas e dia ey.
Nos kier pidi cooperacion di mayor pa controla regularmente boso yiu riba pieu. Pieu ta algo contagioso. Un mucha cu wordo haya cu pieu ta haya un carta di aviso pa mayornan pa trata nan yiu mas lihe cu ta posibel. Si e mucha bin scol atrobe y ainda e tin pieu, e ta wordo manda cas y por bolbe scol atrobe te dia cu su cabey ta limpi.
Nos kier stimula mayornan pa manda nan yiu scol cu pan y juice. Laga bo yiu desayuna prome cu e bin scol pa asina e por cuminsa e dia yen di energia.
Na scol nos ta bende refresco, juice, chocolade y strawberry melk. Nan ta costa fls.1.00 y 1.25
Ora bo yiu haci aña sigur e kier treat. Nos ta prefera pa e treat ta saludabel. Si ta un cos di come, e ta wordo reparti entre 11:45 y 12:00or di merdia.
Controla si bo yiu a traha su huiswerk y con e ta trahe. Hopi biaha e huiswerk ta wordo traha den pura y masha slordig. No acepta esaki!
Purba di overhoor bo yiu, firma e huiswerk, agenda, proefwerk, strafwerk etc si esey ta wordo pidi. E intencion ta pa traha e aña aki mas estrecho cu mayornan riba tereno di huiswerk. Den e huiswerk lo por tin preguntanan y tareanan cu e muchanan mester aserca mayor pa ayudo of pa traha hunto.
Percura pa e yiu no lubida su huiswerk, su mapnan na cas.
Si e no tin su articulo nan na scol, e no por traha den klas.
Nos ta pidi cooperacion di mayornan pa cu e trafico dilanti di scol. Core cu cuidou y purba para di tal manera cu boso yiu por cana bay den auto of den scol sin peliger.

Aseguro di accidente na scol

Si un mucha cay na scol y nos ta haya cu e ta grave, cabesante lo hibe eerste hulp. Alaves lo tuma contacto cu mayor.
Ora e caida ta menos serio, nos ta trate na scol mes y si pa merdia e mucha tin dolor ainda, nos ta dune un carta pa mayornan hibe dokter e mesun atardi.
Tur mucha, cu excepcion di algun, tin seguro via A.Z.V. . Esun cu tin seguro priva mester entrega copia di esaki na cabesante of maestro di klas.
Via S.K.O.A. e alumno tin un seguro di Afl. 10,= cu ta cubri accidente durante actividad paden y pafor di scol.

10 manera cu mayor por yuda e yiu pa e ta un bon studiante

Pone e yiu drumi trempan;

Laga e yiu bin scol tur dia;

Corda e yiu  pa pone su material di scol cla;

Papia cu e yiu pa e pone bon atencion den klas;

Splica e yiu pa semper caba cu su trabou na ora;

Controla si e huiswerk ta na ordo;

Splica e yiu cu si e no compronde algo pa e pidi ayudo;

Anima e yiu pa participa na e actividadnan den klas;

Pone enfasis pa e yiu sigui tur regla di klas y di scol;

Motiva e yiu pa semper e haci su best.

Reglanan di Scol

Nos ta spera cu mayornan repasa e reglanan di scol hunto cu nan yiu p’asina tur hende ta na altura di nan. E reglanan tey pa tur cos bai bon na scol y nos ta spera cu tur tene nan mes na e reglanan.

• Nos ta percura pa ta na scol na ora tur dia.

• Nos ta traha / siña nos huiswerk nechi y bon.

• Nos no ta lubida nos huiswerk, buki, schrift of ringband na cas.

• Nos ta laga nos mama of tata firma e huiswerk, schrift, agenda, strafwerk of proefwerk ora meneer of jufrou pidi esey.

• Nos no ta bringa na scol.

• Nos no ta papia palabra malo of cu dobbel sinti na scol. Ni cu mucha, ni cu hende grandi. Nos ta papia nechi y cu respet na scol.

• Nos ta cuida tur material di scol den nos klas: e bukinan, schriftnan y otro material. Pesey nos tin un bon tas.

• Papel y otro sushi nos ta tira den e baki di sushi. Nos ta tene nos klas y scol limpi.

• Nos ta tene nos scol bunita: nos no ta scirbi riba nos banki, stoel of muraya.

• Nos a bin scol pa siña, pesey nos ta pone atencion den klas.

• Ora bel bati, nos ta bay para di biaha den rij. Nos ta para nechi den rij y ta drenta klas trankil.

• Nos ta percura pa bisti nos uniform tur dia: nos ta bisti nechi y decentemente.

• Cabey largo y renchi orea pa mucha homber no ta permiti.

• Ora nos ta malo, ora nos no bin scol of ora nos yega scol laat, nos ta trece un carta.

• Nos no ta hunga riba gang, den klas of patras di scol, ni den pauze of promer cu bel bati.

• Nos no ta come mangel of bals na scol of den klas.

• Nos no mag sali for di cura di scol sin permiso.

• Ora juffrouw of meneer no ta den klas nos ta keda keto y no ta cana rond.

• Ora di cruza caminda, nos ta keda para tras di e strepi te ora bisa cu mag di cruza. Mi ta cruza e caminda meimei di e brigadiernan di trafico riba e zebrapad.

• Mi banki semper ta na ordo : e bukinan, e schriftnan netjes poni, sin propjes, pan bieuw etc.

• Nos ta tene e wc-nan nechi y limpi. Nos no ta hunga den e bañonan.

• Nos ta tene nos biblioteca y videolokaal den bon condicion y limpi: nos no ta come  eyden y nos ta cuida e bukinan, mesanan etc.

• Nos ta stima naturaleza: pesey nos no ta hunga den e bakinan di mata y nos no ta kibra e matanan.

• Mi ta mustra respet pa mi Himno y Bandera dor di para  y canta bunita.

• Mi ta mustra cu mi ta orguyoso di ta un alumno di Colegio Cristo Rey y mi ta orguyoso riba mi pais Aruba.

• Si tin sospecho di arma of articulo prohibi/horta, cabesante of maestro tin derecho di listra alumno of su tas.

• Piercing ta completamente prohibi!

Ta prohibi pa haci uso di telefon cellular na scol. Maestronan ta kita esaki for di e alumnonan y entrege na e director di scol. Esaki na su turno ta entrega esaki na oficina si S.K.O.A. unda e mayor por bay busk’e

Himno di Colegio Cristo Rey